يا دكتوره
قصيدة ~ يا دكتوره
الكاتب ~ على عبدالرحيم محمد ~ يكتب..
₪₪₪₪₪₪₪₪₪₪₪₪₪₪₪₪₪
يا دكتوره ...
...فى سكوت الليل لملمت كل جروحى
وبعترتها على سطور حروفى
وحطمت خجلى وخوفى
وناديت تعالى يا دكتوره شوفى
الصوره اللى جوايا باهته ليه
حزينه ليه.شكل الصوره اللى جوايا ايه
انا تايه جوايا ومش لاقى سكه تحضن غنايا
ومش لاقى غير الصوره اللى متعلقه على جدران بكايا الصوره اللى جوايا بتعشق السكوت
والحس الجميل اللى فى احساس الناس المنحوت
وبتعشق الضحكه الصادقه
والكلمه الصادقه والخطوه الهاديه
الصوره اللى جوايا لو ماحستش
فى صدقى حتى فى بكايا تموت تموت
..يبقى البديل يا دكتوره ايه
كتبت عن الحب وعندى حرمان منه
ماعرفش حاجه عنه
بخاف اقرب منه يبقى البديل يا دكتوره ايه
لما اشوف فدادين الامال والاحلام بتاكلها النار
وبتصبح اوهام..يبقى البديل يا دكتوره ايه..
..مشيت فى شوارع سنينى اللى فاتت
سالت عن الفرحه قالوا ماتت
عن الضحكه قالوا ماتت
عن الامان قالوا كانت سنين وفاتت
عن الحنان قالوا كانت نزوه وتابت
عن الامانى قالوا كانت بيوت وانهارت
مشيت لاقيت مكتوب
على حطيان الحياه غربتى وشقايا...
..يبقى البديل يا دكتوره ايه.....
..شكل الصوره اللى جوايا...ايه......
.على عبدالرحيم محمد
تعليقات
إرسال تعليق