خلاص مسافر؟!
قصيدة ~ خلاص مسافر؟!
الكاتب ~ سميرمحمود ~ يكتب...
₪₪₪₪₪₪₪₪₪₪₪₪₪₪₪₪₪
خلاص مسافر؟!
طب مين هيسأل او يزورني
ومين في تعبي هيشاطرني
ومين هيبقى ف يوم فاكرني
ومين يجاوب لو سألته؟!
.....................
وازاي قدرت تقول كده
وانت الحياة في الأوردة
وازاي تنول طعم الرضى
وقلبي رافض من بدايته؟!
.....................
معقولة ياابني ههون عليك؟!
ارجوك ابوس يعني ايديك؟!
داانا عشت عمري كله ليك
لو روحت يبقى اكيد نهايته
..................
وان كان على ضيق الحياة
خد كل شيء والبعد لا
محتاج ابوك تقعد معاه
محتاج يشوف بيك ابتسامته
...................
دا انت السند وانت الوحيد
ازاي هنام وانت بعيد؟!
وازاي ببُعدك هستفيد؟!
والفرح بعدك ايه حلاوته؟!
................
أنا عارف إن إنت بطل
لكن قرار بُعدك هطل
نبض الحياة راح ينقتل
وهنعمل ايه لو يوم قتلته؟!
.................
صحيح طريقك كله صعب
بس انت اصبر قول يارب
خليك ف وقت الشدة صلب
وافتح ف بابك لو قفلته
.................
فكر وبعدين خد قرار
يا إما جنة يا إما نار
والجنة مش بُعد وفرار
الجنة حلمك لو حايلته
..............
يا ابني وضنايا ابوك كبر
مبقيتش واثق ف البشر
ومليش سواك إنسى السفر
وخفف الحمل اللي شيلته
....................
مبقيتش قادر ع البعاد
من بعد أُمك همي زاد
وانت الوحيد ومليش ولاد
وقلبي موجوع وانت عيلته
....................
اقعد وخد كل المعاش
وانده لحلمك لو مجاش
الحلم موجود ما انتهاش
والجهد عنوانه وعلامته
...................
يابلدنا حني وطبطبي
حسي بولادك قربي
مش كل حلم تسرسبي
ولا حاسة بوجوده وكرامته؟!!
بقلمي/سميرمحمود
تعليقات
إرسال تعليق